لماذا خلقنا الله؟ من سلسلة حمادة ومخمخ.

حوار حمادة ومخمخ: صراع النقل والعقل

مخمخ: ألا قوللي يا حمادة، هو ربنا خلقنا ليه؟ سؤال بريء أهو من غير فزلكة.

حمادة: يا ابني ده سؤال إجابته معروفة من وأنت في حضانة. “وما خلقت الجن والإنس إلا ليعبدون”. ربنا خلقنا عشان نعبده ونعمر الأرض، حكمة واضحة وضوح الشمس.

مخمخ: نعبده؟ طب ما الملائكة بتعبد ليل نهار وما بتشتكيش، وما بيعصوش ربنا. إيه لزوم كائن مليان عيوب وشهوات وبيتخانق على كيلو السكر عشان يعبده؟ وبعدين، هو ربنا محتاج عبادتنا دي في حاجة؟ مش هو “الغني عن العالمين”؟

حمادة: استغفر الله العظيم.. يا مخمخ ربنا مش محتاجنا طبعاً، العبادة دي لينا إحنا عشان نرتقي وننول الجنة. هي مسألة اختبار.. دار ابتلاء عشان يبان مين اللي هيطيع ومين اللي هيعصي، ومين يستحق الثواب ومين يستحق العقاب.

مخمخ: (بيضحك بسخرية) اختبار؟ طب ركز معايا كده في المنطق المضروب ده. ربنا “عالم الغيب والشهادة”، صح؟ يعني عارف نتيجة الاختبار قبل ما يخلق ورقة الأسئلة أصلاً! عارف مين هيدخل الجنة ومين هيتشوي في النار. بيمتحننا ليه بقى؟ كأنك بتعيد فيلم أنت حافظه صم ومستني البطل يغير رأيه في الآخر!

حمادة: أنت بتقيس حكمة الخالق بعقلك المحدود، ودي مغالطة يا مخمخ! علم ربنا المسبق حاجة، وحرية إرادتك أنت حاجة تانية. هو عارف هتعمل إيه بس سابلك الاختيار عشان يقيم عليك الحجة. عشان يوم القيامة ماتقولش “يارب دخلتني النار ليه من غير ما تديني فرصة أعمل حاجة”.

مخمخ: إقامة حجة؟ يعني يخلقني، وهو عارف مسبقاً ومكتوب عنده إني هفشل وهدخل النار، ويخلق النار دي مخصوص، ويقولي أنا جبتك عشان أقيم عليك الحجة؟ طب ما كان وفر عليا وعليك اللفة دي كلها وما خلقش اللي عارف إنهم هيتعذبوا! أين الرحمة في إيجاد كائن مصيره معروف إنه العذاب الأبدي؟

حمادة: دي حكمة إلهية أنت مش هتقدر تستوعبها. الكون ده مبني على التضاد، لولا الشر ماعرفناش الخير، ولولا النار ماعرفناش قيمة الجنة. وبعدين في أسماء وصفات لله لازم تظهر، زي “الرحمن، الرحيم، التواب، المنتقم، العدل”.. الصفات دي هتظهر إزاي وتتجلى من غير خلق يغلطوا ويتوبوا فيغفرلهم، أو يظلموا فيعاقبهم؟

مخمخ: أيوة.. يعني إحنا مسرحية أو أدوات عشان تظهر الصفات دي؟ يعني ملايين البشر اللي بيتفرموا في الحروب، والأطفال اللي بتموت بالأمراض والمجاعات، دول مجرد “كومبارس” عشان التضاد يكمل واللوحة الفنية تطلع حلوة؟ بذمتك ده كلام يدخل العقل؟

حمادة: يا مخمخ الدنيا دي كلها بجراحاتها ومآسيها لا تساوي عند الله جناح بعوضة. الألم والوجع ده مؤقت جداً، والتعويض في الآخرة أبدي. أنت باصص من خرم إبرة وشايف اللقطة دي بس، مش شايف الصورة الكاملة. ربنا عدل، ومفيش ذرة ألم بتضيع هدر.

مخمخ: (بيطقطق صوابعه) “الصورة الكاملة” اااااه .. ده الكارت السحري اللي بيطلع من كُم الساحر لما المنطق يخلص. أول ما تسأل سؤال ملوش إجابة، يتقالك “أصلك مش شايف الصورة الكاملة” و”بتقيس الخالق بالمخلوق”. عموماً يا حمادة، أنا هفضل أسأل وأدور على إجابات، ده حتى الأنبياء نفسهم شغلوا عقلهم وتعبتهم الافكار! إبراهيم دور في الملكوت وقال ﴿لَا أُحِبُّ الْآفِلِينَ﴾، ولما سأل عن إحياء الموتى قال ﴿وَلَكِن لِّيَطْمَئِنَّ قَلْبِي﴾. فلو العقل ده ملوش لازمة ومطلوب منه يبصم ويقول آمين وبس، ماكانش “الخالق” حطه في دماغي من الأول.

حمادة: اسأل يا سيدي براحتك، بس خد بالك عقلك ده يوديك في داهية وتخسر دنيتك وآخرتك. العقل له حدود زي ما البصر له حدود، لو بصيت في الشمس مباشر هاتتعمى.

مخمخ: وأنا يا سيدي أفضل أتعمى من نور الشمس وأنا بحاول أشوف وأعرف، على إني أعيش عمري كله مغمي عيني ومستخبي في الضلمة عشان خايف من النور!

تدخل الراوي: حدود العقل وسر الغيب

(يتدخل الراوي د. محمد البري قاطعاً الحوار)

الراوي (محمد البري): بااااااس إنت وهو، بطلوا دوشة صدعتوني!

حمادة عنده حق في حاجتين؛ إن هدف العبادة ده هدف بتاعنا لاجتياز الامتحان، مش هدف أو احتياج للمولى حاشاه. لكن حمادة غلطان في اختلاق أسباب للخلق مثل تجلي صفاته أو أي مبرر آخر.. وعنده حق إن للعقل حداً ينتهي إليه مثلما أن للبصر حداً ينتهي إليه.

ومخمخ عنده حق، آيات التفكر وإعمال العقل في القرآن كثيرة وضربت أمثلة دون الحصر، مثل التفكر في خلق السماوات والأرض واختلاف ألواننا وألسنتنا وخلافه.. المولى خلق لنا العقل لنتفكر ونتدبر. فكر يا مخمخ براحتك، ومش هقولك حرام تفكر في الموضوع ده، فكر براحتك ومش هقولك هتتجنن والخزعبلات دي، لكن حدود عقلك اللي أشار ليها حمادة مش هتوصلك لشيء. حاول تفهم.. أي حيوان لو حاولت تخليه يقرأ رواية مش هيقدر، ولو قعدت معاه عمره كاملاً، لأن قدراته العقلية محدودة ولها سقف.. كذلك عقلك!

والدليل إن ربما هذا السؤال تحديداً، هو وسؤال آخر، لن يصل إليهما العلم أو العقل البشري أو الذكاء الاصطناعي ولا حتى الملائكة. الملائكة في عالم الغيب كانوا يعرفون ما حدث ويحدث وسيحدث لأنهم خارج الزمكان، لكن لم يعرفوا الإجابة، فلقد سألوا المولى قبل حدوث الزمن وقالوا: “أَتَجْعَلُ فِيهَا مَن يُفْسِدُ فِيهَا وَيَسْفِكُ الدِّمَاءَ وَنَحْنُ نُسَبِّحُ بِحَمْدِكَ وَنُقَدِّسُ لَكَ”؟ فكان الرد الإلهي القاطع: “قَالَ إِنِّي أَعْلَمُ مَا لَا تَعْلَمُونَ”. الملائكة المُطَّلعين مش عارفين وبالمصري “مش فاهمين حاجة وبيخبطوا كف على كف”.. فالله اختص لنفسه السبب ده (إن كان عالم الغيب أصلاً فيه سببية!!).

فبص يا مخمخ، لماذا خُلقنا وما هي الروح.. ربما هذان الأمران فقط هما من أمور الخالق. عايز تفكر فيهم فكر يا حبيبي لكن لن تصل لشيء.. ولو وصلت لشيء معاك تليفوني، أبقى كلمني هسمعك كويس..

المعضلة المادية للإلحاد: حائط سد الفيزياء

تتمثل المعضلة المادية للإلحاد في النقاط التالية:

• •
  قانون حفظ الطاقة: تقر الفيزياء بأن الطاقة لا تفنى ولا تُستحدث من العدم. ظهور “نقطة التفرد” (Singularity) التي أنتجت الانفجار العظيم بطاقة وكثافة لا نهائية يتعارض ظاهرياً مع هذا القانون إذا تم افتراض ظهورها من العدم المطلق دون مُسبب.
• •
  انهيار السببية والزمن: الزمن والمكان (الزمكان) وُلدا مع الانفجار العظيم. السؤال عما كان “قبل” الانفجار يفقد معناه؛ لأن الزمن لم يكن موجوداً من الأساس لكي يكون هناك “قبل”. عند هذه النقطة، تنهار معادلات الفيزياء وتتوقف أدوات القياس.
• •
  تفسيرات ميكانيكا الكم: تُطرح نظريات مثل “التموجات الكمية” (Quantum fluctuations) كآلية لظهور المادة من الفراغ. لكن هذا يطرح معضلة أخرى لا إجابة لها: من أين نشأ الفراغ الكمي نفسه؟ ومن الذي أوجد القوانين الفيزيائية الحاكمة له؟

وراء كل نظام كوكبي متزن، تصميم ذكي يديره. دعنا نضع هذه الدقة في خدمة مشروعك من خلال حلول إعلانية وتسويقية متكاملة تخاطب العقول.

-تواصل مع فريق NAB

–تاريخ شركة نــاب
-إزاي نساعدك في نــاب
-باقات شركة نــاب
-شغلنا في شركة نــاب

• 
  
  

  اسم الكاتب:

  دكتور محمد البري

  أستاذ مساعد – كلية فنون رقمية

  دكتوراه بفلسفة الفنون للجرافيك. باحث ومتخصص في الويب والتصميم، وحاصل على جوائز محلية ودولية بالرسم والتصميم.

  تمت بحمد الله،،